سوسن نواده رضی

شعر(قوشوق) ، شاعرین (قوشوقچونون)  دوغانین و توپلومون سورونلاری قارشی سیندا  وئردیگی قارشیلیقدان عبارتدیر.دوغا، توپلوم، یاشام فرمول لاری، ایناملار ،اؤلچولر و داها دوغروسو هر بیر فنومن دائما ده ییشمکده دیر.بونا گؤره ده دوغال و توپلومسال فنومن لردن  الهام  آلان  هر بیر هنر، خصوصیله ده شعر، ده ییشیلمز ، دورغون و ساکن حالدا قالا بیلمز.

توپلومدا اؤزل قوشوللارلا  قارشیلاشینجا ، و یا هر هانکی بیر گرگین لیک یارانینجا ،  زمانین او بؤلومونده اؤزل بیر مرحله  و بو مرحله یه  مخصوص اولان چکیجی  سوورونلار  یارانیر. بو اؤزل  دوروم  هر بیر اینجه صنعت  خصوصیله ده   شعر و ادبیاتا  ائتکی سینی  بوراخیر. پس بئله دئمک اولور کی، زمان سوره کلی  ده ییشمه لر  تؤره تمکده دیر و هر بیر ده ییشیم و تحول شعر و دیگر صنعتلرین  ده ییشیلمه سینین  گرکدیگینی  ساغلاییر . بونا گؤره ده هنر اوچون ثابت اولگو نظرده توتماق ، اونو اؤزل  قالیبلره  سالماق و قوشاتماق  آنجاق  یئته نکلری  کور ائله ییب  ده، یارادیجیلیقلاری آرادان آپارماق آنلامینی داشییا بیلر.هنره مخصوص مدل وئرمک، ذهنین اؤزگورلویونون  و نهایت سیز  یارادیجیلیغینین ،باشقا دئییم له ،هنرین ذاتینین قاپیلارینی  قاپایار.

قوشوق (شعر) دا باشقا هنرلر کیمی سینیرسیز بیر عالم دیر. قوشوق (شعر) نه مضموندا ، نه ده شکیل و موضوعدا محدود اولا بیلمز.شعر أن خصوصی و کیچیک سورونلاردان و أن جزئی  اولایلاردان، ها بئله بشرین أن اؤنملی مسئله لریندن سؤزآچا بیلر.

قوشوق ، ایکی یؤنلو ایلیشکی  یاراتمالی دیر؛ اؤنجه  قوشوقچو(شاعر) ایله "اؤزو" آراسیندا و سونرا دا قوشوقچویلا قوشوغو اوخویانلارین آراسیندا . و اصل قوشوقچو او کسدیر کی، حقیقتاً بو ایلیشکینی یارادا بیلسین. شعر، شاعرین  دوشونجه لری ،حسلری ، اورک سؤزلری و داها دوغروسو ایچیندن جوشان دویغولاری دیر و اولا بیلر کی بعضاً منطقلی آنلاملاردان اوزاق گؤزوکسون . شعر ، دوزیازی کیمی اؤنجه دن دوشونولوب  ده کاغیذا گلینمز ، بلکه بیر آنین ایچینده ، قیغیلجیم کیمی ، قوشوقچونون ذهنینده سایریشار . بونا گؤره ده قوشوغو  دوزیازی کیمی درین و منطقلی دشونجه لرله فکرلشیب "دوزلتماق" ممکن دئییلدیر ، بلکه قوشوغو ، قوشوقچو بیر "جان آییقلیغی"  ائتکیسینده  "یارادار".

قوشوقچو ، اؤز زمانه سی نین فنومن لریندن  و انسانی دوشونجه لردن  الهام آلاراق ، کؤتولوکلره، کؤهنه چیلیقلارا، أکسیکلییه و انسان دیشی (ضد انسانی) ایناملارا  و انیسانین اوجالماسینا ،یوکسه لیشینه و تعالی سینه  مانع اولا بیلن هر نه یه قارشی چیخار.خلق قوشوقچوسو هر زمان او زمانین دیلی ایله دانیشار و اوره یی خلق ایله و خلق اوچون چیرپینار... و بئله لیکله مدرن شعر یارانار.مدرن شعر،  پیرپیز، پیر-پیتلاشیق ، دارماداغینیق و داها  دوغروسو  آنلامی اولمایان  و چتین آنلاشیلان  سؤزلر قوشماق  دئییلدیر ،  بلکه  زمانلا  اویوشان و انسانین  أل آیاغینا  دولاشان  زنجیرلری  قیر ا بیلن سؤزلردیر.

اؤنجه کی قوشاقلارین(نسللرین) شاعرلری نین سؤزلرینی چاغیمیزین یئنی و گنج قوشوقچولاریمیزین قوشوقلاریندا اوخویاندا ،دوغروسو انسانا داریخما ، اوره یه سیخینتی گلیر. "فضولی" ، " نظامی" و سایر آدلیم شاعرلرین شعرلری نین اؤره یه یاتماسی نین سببی اونلارین اؤز زمانه لرینه اویغون اولدوقلاری و اؤز چاغلاری نین دیلی ایله دانیشماقدا دیر. چونکی اونلار

کئچمیشده کی لرین  سؤزلرینی اؤز شعلرینده بیرووز  آلمامیشدیرلار و کئچمیشده کیلر اونلار اوچون یالنیزجا بیر چیراغ اولموشدور اؤز زمانلارینا ائله جه ده گله جه یه ایشیق ساچماق اوچون.

تأسف لنمه لی دیر کی ، دنیا دا شعر و ادبیات ، مدرنیسم مرحله سینی  چوخدان اؤتوب کئچن حالدا ،بیز هله بو مرحله یه آددیم آتا بیلمه میشیک ، هم ده گونده مین دفعه کئچمیشده کی شاعرلرین شعرلرینی سؤکوب ، یئنی دن قوشوروق.